Fékk 8,7 í síðasta kaflaprófinu í eðlis og efnafræði og þarf ekki að taka lokapróf... úje!

Ta,ta Linda "Einstein better watch his back" Markúsardóttir 

Ég var að keyra í vinnuna áðan sem væri ekki í frásögu færandi nema fyrir það að í hvassvirðinu lenti á framrúðunni hjá mér greiðslukort! Ekki staldraði það lengi við og hvarf með vindinum jafn snögglega og það birtist. Nú er mér spurn, er litla Ísland ekki orðið einum of kapitalískt ef það er farið að rigna kredit og/eða debet kortum? Er kaupmáttur okkar orðinn svona gríðarlegur að veðurguðirnir sjálfir eru farnir að veita því athygli og reyna að aðstoða okkur við eyðsluna? Eða er kannski einhver þarna úti sem ég fékk nóg af því að fylgja reglum samfélags þar sem er allt er falt fyrir rétta upphæð og veitti því kortunum sínum frelsi fuglanna?

Linda "jólin eru hátíð arðræningjanna" Markúsardóttir

Já unaðsleg próftíðin framundan, hef verið að velta því fyrir mér hvort það væri kannski viturlegt að taka plastið utan af skólabókunum... En ég bið ykkur vinsamlega um að afsaka hlé þar til 12.desember en dann dag mun ég bjóða til bókabrennu í bakgarðinum heima.

Ta,ta Linda "læra" Markúsardóttir

Kona hringir í lögregluna og kvartar sáran yfir því að í víkinni fyrir neðan gluggan hennar séu naktir piltar að baða sig. Lögreglan mætir á staðin og biður þá vinsamlega að færa sig. Ekki líður á löngu þangað til konan hringir aftur, enn eru þeir að baða sig naktir örlítið lengra í burtu.... Lögreglan biður þá piltana aftur um að fara en enn hringir konan. Lögregluþjóninn sem svarar segir "En frú mín góð, við sendum þá meira en  einn og hálfan kílómeter í burtu." Já en, segir konan með púrítínskan hneykslunartón í röddinni ; ég sé þá enn í sjónaukanum mínum!"

Linda "Sloopy Dippindoodle" Markúsardóttir

Já í gær varð undirrtituð 22 ára gömul.... Áfangi sem er með öllu tilgangslaust því ekkert má maður gera 22 ára sem maður mátti ekki 21 árs. Ég átti hinn ágætasta dag engu að síður hin ofurhugulsama móðir mín færði mér afmælistertu, heitt súkkulaði og afmælisgjöf í rúmið  Að öðru leyti var hann að mestu eins og hver annar ef frá eru talin öll símtölin,sms-in og allar kveðjurnar... Hjartans þakkir til allra sem glöddu gamalt hjarta á þessum vesæla afmælisdegi

Ta,ta Linda "Ó,boy ó,boy" Markúsardóttir 

• Sá ég mann tala í vasareikninn sinn... (sem reyndist síðar vera farsími.)
• Keypti ég pennasett til styrktar Sjálfsbjörg og er stolt af því.
• Horfði ég á brot úr Píanistanum í sögutíma og skammaðist mín fyrir það að vera mensk.
• Klæddi ég son minn í nýjan kuldagalla...sem er nokkuð líkt því að setja lifandi smokkfisk í bónuspoka með alla arma inni...
• Valdi ég mér kjörbók í ensku sem reyndist vera 800 blaðsíður með 0.003 punkta leturstærð... Mín bíða góðar stundir með stækkunarglerinu.
• Fór ég í kringluna og furðaði mig á því að páskaeggin væru ekki komin í hillurnar.. það er jú komin nóvember!!

          Ta,ta Linda "þarf nokkuð að taka jólaskrautið niður í ár?" Markúsardóttir