Ég er orðin stoltur sjálfrennireiðar eigandi. Já keypti mér þennan forláta Volvo station bíl með skottið fullt af legghlífum og fótboltum! Eða nei..... Hef sagt það áður og segi það enn, station bílar eru bara fyrir kaþólskar mæður og fólk sem á aðeins of marga ketti (já, þú gast þér rétt til, skot á þig Maggi minn! ) Núna mun ég sem sagt sjást æðandi um götur bæjarins á skjannahvítum Hyundai Elantra eða  " The Lindsmobile" eins og ég kýs að kalla hann. Hef þó ekki fest það nafn enn því Vinabær 2 kemur einnig til greina enda eiga allir að vera vinir í Vinabæ. Já það er gaman að þessu, það er ungt og festir kaup á bílum eins og ekkert skáld sagði. Svo er líka búið að kjósa nýjan páfa eins og alþjóð veit. Jóhannes blessaður ákvað loksins að sleppa takinu eftir vel liðlega 80 ára dvöl á þessu tilverustigi. Hlýtur þetta ekki að gera svolítið lítið úr máltækinu "Þeir sem guðirnir elska deyja ungir"? Ef ekki það þá að minnsta kosti sú staðreynd að þú verðir að vera orðinn að minnsta kosti 60 ára til að verða páfi!! Nýji páfinn,sem tók sér nafnið Benedikt 16 hefur það skemmtilega viðurnefni "Rottweiler guðs". Fór örlítið að velta vöngunum mínum, ætli Móðir Teresa hafi þá verið púðluhundurinn hans Guðs?  

Ta,ta Linda "ég berst á fáki fráum" Markúsardóttir

Já, ég hélt galvösk til sjúkraþjálfa liðlega fyrir hádegi og ætlaði mér nú heldur betur að taka rækt líkama míns með trompi. Skellti mér á hlaupabrettið til upphitunar en ekki leið á löngu þar til ég fór mása, hvæsa og blása. Til þess að hafa þetta sem nákvæmast liðu svona um það bil átta sekúndur Það er deginum ljósara að eithvað verð ég að gera í þessum málum ef ég vil ekki fá súrefniskút í 30 ára afmælisgjöf. Það væri þá allra helst eitthvað sem krefst þess hvorki að ég hreyfi mig né hugsi, ég er jú einna hrifnust af þesslags hlutum. Nú er eg líka orðin ráðsett húsmóðir (það er ef það felst í því að sitja sem fastast við tölvu daglangt) en ég og Arnór settum upp hringana á laugardaginn síðasta. Brúðkaup verður einhvern tímann eftir að ég klára skólann þannig að þið takið kannski frá einhvern góðan sunudag á árabilunum 2009-19. En þessi trúlofun og trúlofanir yfir höfuð fengu mig til að leiða hugann að ástinni. Ég er sannfærð um það að ég elski hann en ég er jafnvel enn sannfærðari um það sem einhver vitur maður sagði " Margur hefði aldrei orðið ástfanginn hefði hann aldrei heyrt þetta orð." Ótrúlega mikið til í því, að fólk sætti sig bara við það sem það hefur og reyni að sannfæra sjálfa sig um að það elski manneskjuna bara af ótta við það að geta ekki betur....   Sorglegt en engu að síður satt. Kannski með ólíkindum niðurdrepandi pælingar hjá nýlofaðri manneskju en ég get bara ósköp lítið að því gert Fór með son minn í fyrsta sinn í ungbarnasund á laugardaginn var og allt í góðu lagi með það og stóð hann sig með stakri prýði. En það að fara í sund þýðir alla jafna að maður þurfi að klæðast sundfötum. Ég verð nú bara að spyrja, hver átti eiginlega hugmyndina að þessum skaðræðisgripum?? Sú manneskja hefur augljóslega ekki þjáðst af neinu af eftirfarandi : appelsínuhúð, offitu, smá fitu, miklum hárvexti, stuttum útlimum, lafandi rasskinnum, tepokabrjóstum eða öðru í þeim sama dúr. Fussumsvei segi ég bara og skrifa! Nú held ég að nóg sé komið í bili, lifið heil.

Ta,ta Linda " Adidas sundgalli með sokkum?" Markúsardóttir   

Þið verðið að afsaka að ég hafi þurft að halda ykkur í myrkrinu í heila átta daga! Tölvan er búin að vera að setja nýtt íslandsmet hjá eiganda sínum í ergelsi En hún er orðin starfhæf að minnsta kosti í augnablikinu og þá þarf ég að sjálfsögðu að hamra gæsina á meðan hún er heit Það hefur svo sem ekkert stórfenglegt gerst á þessari rúmu viku, ég er þó loksins farin að geta sofið á næturnar. Sem þýðir að ég get ekki lengur talist til þess að vera næturgali sem er mjög skrýtið, því ekki er ég minna galin á nóttunni en á daginn.....  Er líka komin á fullt hjá sjúkraþjálfanum henni Cristine sem er þýsk og endar hverja setningu á  Ja,ja. Átti mjög erfitt með mig fyrst, sá alltaf fyrir mér hinu þýsku Brynhildi úr Fóstbræðrum en það var með eindæmum fyndinn karakter! Er þó að komast yfir þetta núna og nýt þess til fullnustu að vera 50 árum undan meðalaldri þeirra sem mæta til sjúkraþjálfa   Er búin að vera töluvert hjá henni systur minni síðan litla Sólveig María (já, hún er komin með þetta líka fína nafn!) kom í heiminn. Það gengur allt eins og í lygasögu á þeim bænum og er lilta hörkutólið komið vel yfir fæðingarþyngdina. Hef ekki frá meiru að segja í bili, góðar stundir

Ta,ta Linda "tölvan mín sætir ofbeldi" Markúsardóttir. 

Já, klukkan rétt um tíu að morgni og ég nú þegar búin að fara í bíltúr með fylgju, það eru örugglega ekki mörg ykkar sem hafa afrekað það Hún systir mín ól gullfallega 11 markna og 49 cm stúlku klukkan liðlega 1 í nótt og gekk fæðingin framar vonum og fljóta þær um á rósrauðu skýji með nýjasta fjölskyldumeðliminn. Fór og leit aðeins á hana í morgun, afskaplega svipmikill og smá þessi unga dama og yndisfríð eins og hún á nú kyn til Langaði bara svona að deila þessu með ykkur, hendi svo inn myndum af henni við fyrsta tækifæri. Til að útskýra fyrstu setninguna þá héldu Beggý og Brynja fylgjunni og báðu mig um að koma henni í frysti fyrir sig. Ætla ss ekki að fara að leggja fylgjubíltúra í vana minn svona í morgunsárið.

Ta,ta Linda "kraftaverk lífsins er undursamlegt" Markúsardóttir 

Já það er eitthvað farið að gerast hjá henni systur minn sem er í dag komin 39 vikur á leið Verkirnir koma með svona 7 mín millibili þegar þetta er skrifað þannig að það styttist að öllum líkindum í kraftaverkið  Ég lofa ykkur svo að fylgjast með, allir að senda henni góða strauma

Ta,ta Linda " stelpa? strákur?" Markúsardóttir

 Fór í fyrsta tíma af svona 6000 hjá sjúkraþjálfa í morgun og kostaði hann mig ör og sáralitlar 1800 krónur. Þar á ég að mæta tvisvar í viku og þarf auk þess að kaupa mér aðgang að salnum. Og ef hin örlitla stærðfræði kunnátta mín er ekki að bregðast mér þá væri þetta að kosta mig  17000 krónur á mánuði! Jóhannes í Bónus og Dísa í World Class hafa kannski efni á vöðvabólgu en ekki Linda í barnsburðarleyfi! Er að hugsa um að kynna mér fjarhrif svo ég geti haldið á Markúsi með hugarorkunni einni eða jafnvel að bryðja vöðvaslakandi í öll mál! Já ég bið ykkur kæru lesendur um að taka þessu ranglæti ekki þegjandi og hljóðalaust heldur mótmæla og kvarta sem áttræðar einmanna konur væruð! Það ætla ég mér að minnsta kosti að gera við alla þá sem vilja á mig hlýða og hengja miða með skoðun minni á þessu ákveðna málefni aftan á hina! Þar hafið þið það Ákvað að hætta að setja gesta og skoðanaleysið fyrir mig og halda skriftum mínum ótrauð áfram enda er þetta aðallega í þeim tilgangi gert að halda í þann snefil af geðheilsu sem ég á eftir. Já dagurinn sem tölvan fer að dæma mig fyrir skoðanir mínar og    hugsanir verður dagurinn sem ég læsi mig inni og gleypi lykilinn með bestu lyst. Það fer óðum að styttast í að fæðingarstyrkurinn minn sé uppurinn en það gerist þann fyrsta maí næstkomandi. En hvað haldiði, stúlkutetrið bara búið að ákveða að skella sér í meirapróf Einhver ykkar veltast án alls efa um af hlátri núna, aðrir eru örugglega að panta sér þyrlur eða önnur loftvæn faratæki á ebay. Mér er þrátt fyrir hinar ýmsu efasemdar raddir dauðans alvara. Ef ekki það þá amk  lífshættulega veik alvara. Annars hef ég ósköp lítið að segja, sótti um hjá Sba- Norðuleið í vikunni sem leið og fæ að ölum líkindum vinnu þar í sumar. Lífið gengur bara sinn vanagang, tvö skref áfram fyrir hvert eitt aftur á bak

Ta,ta  Linda " er hægt að kenna ungabörnum sjúkraþjálfun?" Markúsardóttir