Jæja þá er ég komin heim og verður þorsta Linduþyrsta Íslendinga ekki svalað seinna en ..tja.. bara nákvæmlega núna. Hér kemur mjög gróf ferðasaga (nei ekki svoleiðis gróf, dóninn þinn) ..

• Ferðin hófst eins og gefur að skilja með flugferð. Mér þykir það álíka þægilegt að fljúga og mér mundi þykja það að endajaxl væri deyfingarlaust dregin úr mér með ryðguðum naglbít.. En flugið var blessunarlega stutt og stóráfallalaust.
• Ég og Helga versluðum svolítið, þá að því gefnu að svolítið þýði svo mikið að það þjónaði litlum tilgangi að ganga frá kortinu eftir hverja notkun. Ég mun kannski lifa á hrökkbrauði og klósettvatni það sem eftir lifir árs en ég mun að minnsta kosti gera það í stórglæsilegum skóm.
• Eins og sönnum túristum sæmir skoðuðum við okkur ansi duglega um og löbbuðum því sem nemur hálfu maraþoni dag hvern. Við fórum í hið heimsþekkta vaxmyndasafn og skemmtum okkur konunglega svona á milli þess sem við báðum vaxmyndir afsökunar fyrir að hafa troðið þeim um tær. Við fórum líka á Victoria & Albert museum þar sem við skoðuðum alveg frábæra sýningu um tísku frá örófi til nútímans.
• Við sáum svo Ben Miles (óþægilega myndarlega manninn hér fyrir neðan sem lék ma í Coupling) í verslunarleiðangri í HMV. Verandi ég gat ég ekki sleppt því að gera mig að fífli en þessi saga inniheldur ma mig á annari hnéskelinni og vandræðalega langa störu.

•   Þau ykkar sem vitið á annað borð hvað ég heiti ættuð að vita að ég er gallharður Monty Python aðdáandi. Ég og Helga skelltum okkur því á West End að sjá söngleikinn Spamalot sem er byggður á Holy Grail. Við skemmtum okkur drottningarlega og hefðu grindarbotnsvöðvarnir mínir verið örlítið slappari hefði ég vafalaust migið á mig af hlátri. Guði sé lof fyrir ræktina segi ég nú bara.

Ég held að þetta sé komið ágætt í bili, þeim sem vilja fá frekari smáatriði er bent á að það er jafnframt hægt að tala við mig í eigin persónu.

Ta,ta Linda "heima sæta heima " Markúsardóttir

Það mætti stilla dagatal eftir mér, enn einn föstudagurinn orðinn að veruleika og eftir nákvæmlega rétt tæplega 6 daga fer ég til London!! Og já, ég ætla þangað í flugvél... Ég er komin í sumarfrí og það byrjaði heldur betur með sólskinshvelli og brúnku (þ.e.a.s ef að brúnka er farin að standa fyrir blóðrauðan lit og freknur í þúsunda vís) Enn ein sagan úr ræktinni (ég veit að þið haldið að ég sé bara að hreykja mér en það verður bara að hafa það). Þarna niðurfrá er einn og einn á stangli sem hefur upphandleggsvöðva á stærð við mig og er jafn breiður og hann er hár. Einn af þessum bolum, góðir 2 metrar á hæð og lyftir sennilega minnst fílskálfi í bekk, var að labba út úr laugum á sama tíma og ég þegar síminn hans hringdi. Hann sagði (með durgslegri og djúpri röddu) halló. Næst kom, já mamma mín ég er að koma heim í matinn. Kyss, Kyss." Ég skil ekki ennþá hvernig mér tókst að komast frá inngangnum að bílnum mínum áður en ég urlaðist úr hlátri... En já, föstudagskvöldið bíður fullt af spennandi tækifærum og fullum drengjum .. Allir sem hafa verið í London eiga að segja mér hvað ég verð að skoða þar!

Ta, ta Linda "Lundúnarborgari" Markúsardóttir 

Já blog var það heillin.. Ég er frekar syfjuð þannig að líkur eru á því að þessi skrif mín verði jafnvel samhangislausari og ruglingslegri en venjulega, bara svona svo að þið búið ykkur undir það. Ég fór í bæinn í gær og nei, ég ætla ekki að koma með ,,ég hitti manneskju I og II og við förum á stað A ,B og C þar sem við hittum manneskju III og IV ". Það var ágætt, fyrir utan smá uppköst (ekki mín eigin, þótt að það sé auðvitað alltaf góð hugmynd að gera uppkast). Í öllum heila bænum hitti ég einn karlmann sem virtist vera eitthvað spunnið í en annað kom fljótt á daginn : 1. Hann var bandarískur (reyndar svo að hann var eiginlega bara Bandaríkin í polobol), 2. Hann á kærustu í Kentucky 3. Hann dansar eins og ég ímynda mér að kláðamaur á stærð við manneskju mundi gera.. Það hefur annars sorglega fátt drifið á daga mína síðan síðast, þarf aðeins að bregða mér niður í vinnu á eftir en er svo komin í sumarfrí fram í júlí! Ég tók reyndar inntökupróf í íþróttafræðina við HR um síðustu helgi og það gekk bara ótrúlega stóráfallalaust fyrir sig, það leið amk hvorki yfir mig né reif ég buxur eða vöðva í mestu átökunum.  Þá vitið þið það, eigið góða helgi!

Ta,ta Linda ,,sum frí eru betri en önnur" Markúsardóttir